Nunap iluani pisiumassuseq nunanillu allanik niueqateqarneq

Pisiumassuseq tamakkiisoq 2015-imi -0,4 pct.-inik annikilleriarpoq. Tamatumunnga pissutaanerpaasoq tassaavoq avammut niuerutit piumaneqarnerisa -10,9 pct.-imik annikillisimanerat, taamaakkaluartoq nunap iluani nioqqutissianik pisiumassuseq 2,2 pct.-imik annertuseriarsimavoq. Nunap iluani pisiumassutsip annertuseriarnerata kinguneraa nunap iluani tunisassiorfiit tunisassiornerulernerannik, avataaniit nioqqutissianik eqqussuineq annikilleriaraluartoq. Taamaasilluni BNP 1,7 pct.-imik qaffappoq avataaniillu nioqqutissiat eqqussuunneqartut -5,2 pct.-imik annikilleriarlutik.

 

Pisiumassuseq pilersuinerlu annertussutsimikkut assigiittarput, taamaammallu nikerarneri assigiimmik ingerlasarlutik. Pisiumassutsimi qaffariarneq nunap avataanut niueqateqarnermit imaluunniit nunap iluani pisiumassutsimit aallaaveqarsinnaavoq. Pilersuinermi annertuseriaat avataanit eqqussuinermit imaluunniit nunap iluani naleqarnerulersitsinermit, BNP-imit matussuserneqarsinnaavoq.

 

Piffissat pisiumassutsip qaffakkiartupiloorfigisai amerlanertigut avataaniit eqqussuinerup assingusumik qaffariarneranik kinguneqartarput, tamatumunnga peqqutaavoq piffissami sivikinnerusumi pilersuinerup ineriartorneranut BNP-ip matussusiisinnaassusaata killeqartarnera. Taamatut pisoqartarnera 2010-mi 2011-imilu pisunut assinguvoq, tassani pisiumassutsip qaffariapiloornerata kingunerimmagu avataaniit eqqussuinerup qaffariapiloornera.

 

Titartagaq 2.1. Ukiumoortumik pisiumassutsimi pilersuinermilu ineriartornivimmut alliartortitseqataasut

 

Malugiuk: 2006-2013-imi kisitsisit inaarutaasuupput, 2014-2015-imili kisitsigallarnerullutik.

Najoqqutaq: Naatsorsueqqissaartarfik, http://bank.stat.gl/nrn11